Emri: Thoma Katundi
Viti I ndërtimit: 1926
Adresa: Rruga “Myrteza Këlliçi”
Statusi: Monument Kulture Kategoria II
Gjendja aktuale: E banuar

Në pamje të parë të krijohet përshtypja se, në fakt, po flasim për dy godina – jo për një të vetme. Gjysma e saj është kthyer në hotel dhe ka pësuar ndryshim si pasojë e investimit, ndërsa gjysma e dytë e godinës është në gjendje të keqe, thuajse e braktisur. Hotel “Freya” ka ruajtur strukturën e ndërtesës por janë ndryshuar elementët origjinalë të ndërtimit. Me një sy të lirë mund të vëresh se dritaret, dyert janë vendosur të reja, ballkoni është rikonstruktuar.
Banorët e zonës tregojnë se dëmtimet prej faktori kohë, shtuar dëmeve të shkaktuara nga tërmeti i datës 26 nëntor të vitit 2019, ka bërë që pjesa e parikonstruktuar e godinës të braktiset nga të gjithë qiramarrësit, përveç zonjës së katit të dytë. Ajo rrëfen, prej parvazit të dritares, se godina është në gjendje të keqe.
Teksa i qëndron përballë gjysmës së ndërtesës të lënë në harresë, mund t’ia kundrosh elementet e pandryshuara. Dritaret në pjesën më të madhe janë prej druri, ndërkohë që çatia është e dëmtuar, fasada po ashtu.
Qytetarët përreth njëzëri tregojnë se në këtë vilë dikur kanë jetuar motrat e mbretit Ahmet Zogu.
Pak metra tutje ndërtesës historike ndodhet një pallat i bërë së fundmi, shumëkatësh. Ai ka zëvëndësuar një bllok shtëpish të vjetra, që mbartnin histori dhe një vlerë të rëndësishme për qytetin e Tiranës.

Kliko mbi shenjën + për të lexuar informacionin